Juventus zhgënjeu jo vetëm me paraqitjen ndaj Atletico Madrid, por dhe me fanellën, ose më saktë ngjyrën e saj të gjelbër që ishte objekti i batutave të faqeve të para të të përditshmeve sportive në Itali. Disfata minimale me kampionët e Spanjës koincidoi me debutimin negativ të fanellës së tretë zyrtare të klubit. Një uniformë krejt e gjelbër që nuk ju ka pëlqyer besnikëve të ngjyrave bardh e zi, duke bërë që të shpërthejnë komentet sarkastike të të apasionuarve të futbollit në web: "Në fushë me fanellën e arbitrave", "më djegin sytë", ishin disa nga komentet për të shpërthyer më pas me ironinë e paralelizmave me personazhet e filmave të animuar, "Dipsy e Teletubbies" apo pyetje të tilla, "A mund të luhet në Champions të veshur si Shrek", siç komenton një tifoz i bardhezinjve, ndërsa një tjetër e lë të lirë imagjinatën duke shkruajtur se herën tjetër skuadra do të zbresë në fushë me pizhama e madje dikush bën ironi duke shkruajtur se djemtë e Allegrit kishin si qëllim maskimin për t’u bërë të njëjtë me fushën në mënyrë që të ngatërronin kundërshtarët, raporton "La Gazzetta dello Sport".
