Ministri i Shëndetësisë, Ilir Beqaj, i shoqëruar nga zëvendësministri Klodian Rjepaj, kreu i Inspektoratit Shtetëror Shëndetësor dhe drejtues e punonjës të tjerë të sistemit të kujdesit shëndetësor, zhvilloi një takim të martën me ekipin kombëtar të futbollit në në kuadrin e mbështetjes që përfaqësues të shoqërisë civile dhe personalitete të shquara të sportit, artit, kulturës e shkencës po japin për Nismën "Shqipëria Jo Duhanit".
Ekipi kombëtar i futbollit është aktualisht në fazën stërvitore në vigjilje të ndeshjes së të shtunës me Danimarkën, e vlefshme për eliminatoret e Kampionatit Europian të Futbollit 2016, ndaj ministri Beqaj pati rastin të takohet me kreun e Federatës Shqiptare të Futbollit, Armand Duka, dhe drejtues të tjerë të institucionit më të lartë të futbollit në vend, kapitenin e ekipit, Lorik Cana, trajnerin Gianni De Biasi dhe pjesëtarë të tjerë të ekipit tonë përfaqësues e Komitetit Ekzekutiv.
"Ne besojmë se mbrojtja e shëndetit nga duhanpirja është një nga sfidat kryesore të sistemit shëndetësor, por pa dyshim të Ministrisë së Shëndetësisë. Jemi të bindur se duhet të punojmë në shumë plane, përveç zbatimit rigoroz të ligjit bashkë me ndryshimet e reja. Është shumë e rëndësishme të promovojmë te të rinjtë sportin", tha ministri i shëndetësisë.
Të gjithë lojtarët e përfaqësues sonë të futbollit iu bashkuan njëzëri nismës "Shqipëria, Jo duhanit", e cila u lançua javën e parë të shtatorit nga disa organizata dhe aktorë të shoqërisë civile, mbështetur nga Ministria e Shëndetësisë, me synim informimin dhe ndërgjegjësimin e publikut për t’i thënë ndal duhanpirjes.
Lojtarët e ekipit tonë përfaqësues u shprehën se kjo është një përpjekje që duhet ta bëjmë bashkërisht, duke përcjellë mesazhin edhe te rinia se duhanpirja është realisht e dëmshme për shëndetin.
