Mbrëmjen e së dielës në parkingun e qendrës tregtare “Olympia Center” një person rreth të 30-ave i vuri flakën makinës së Flori Mumajesit. I maskuar me kapuç dhe me dy shishe benzinë në dorë, personi u xhirua nga kamerat e sigurisë teksa futej në garazhdin nëntokësor. Deri më tani, ende nuk është zbardhur identiteti apo shkaqet e asaj që mendohet të jetë një zjarrvënie e qëllimshme. Por disa detaje të ngjarjes, lapsi.al ua sjell të përmbledhura më poshtë.
Sipas dëshmitarëve okularë, i pari që pikasi zjarrin në parking rreth orës 22.25 min ishte këngëtari Klajdi Haruni i cili së bashku me banorë të tjerë, u përpoqën të shuajnë flakët me bombolat e rastit.
Vetëm pak minuta më pas, gjashtë zjarrfikëse dhe shumë forca të Policisë arritën në vendngjarje, por tymi i madh që dilte nga hyrja e parkingut si oxhak, nuk i lejoi ata për orë të tëra të kryejnë ndërhyrjen.
Përkundër informacioneve të publikuara në media që thanë për një Fouristradë, automjetit të cilit iu vu flaka, burime të lapsi.al flasin për një Benz S Class, makinë luksoze.
I gjendur përballë të papriturës, Flori Mumajesi u pa jashtë ndërtesës ku ndodhet studio e tij. Vetëm pak minuta pasi i ishte vënë zjarri automjetit, kantautori i njohur xhironte me telefon tymin që dilte nga parkingu i makinave. Me mbërritjen e mediave në vendngjarje ai u largua duke mos dhënë asnjë reagim për publikun apo fansat.
