Dizejnatorja kosovare Vjollca Llapashtica është angazhuar së fundmi për modelen e njohur Emine Cunmulaj e cila do të marrë pjesë në ceremoninë e inaugurimit të Presidentit të ri të Shteteve të Bashkuara të Amerikës, Donald Trump. “Ndihem shumë e lumtur që në mesin e shumë personaliteteve nga e gjithë bota, një modele me famë botërore ka veshur fustanin, që është punuar në Kosovë, në punëtorinë tim”, ka thënë ajo.
Llapashtica ka thënë se me modelen Cunmulaj ka bashkëpunuar edhe më herët, por kënaqësinë më të madhe e ka pasur për fustanin, të cilin ajo do të veshë në inaugurimin e presidentit Trump. Ai është një fustan i stilit më elegant dhe i përshtatshëm për atë ditë dhe vend.
