'Pele e bëri Brazilin të dukshëm', Neymar i dedikon fjalët më të veçanta legjendës së futbollit pas ndarjes nga jeta

U nda dje nga jeta legjenda e futbollit botëror, braziliani Pele. Neymar ka bërë një postim në rrjete sociale ku flet me mirënjohje të madhe e me shumë vlerësim për të ndjerin. Ai ka shkruar se ndonëse ka ikur, Pele është “përgjithmonë”.

“Përpara Pele, 10-a ishte thjesht një numër. E kam lexuar këtë frazë diku, në një moment të jetës time. Por kjo fjali, e bukur, është e paplotë. Unë do të thoja se përpara Pele futbolli ishte thjesht sport. Pele i ka ndryshuar të gjitha. Ai e ktheu futbollin në art, në argëtim. U dha zë të varfërve, njerëzve me ngjyrë dhe mbi të gjitha: E bëri Brazilin të dukshëm! Futbolli dhe Brazili e kanë ngritur statusin e tyre falë Mbretit! Ai ka ikur, por magjia e tij mbetet. Pele është PËRGJITHMONË”, ka shkruar Neymar.

Kujtojmë se pak ditë më parë Pele u shpall "Lojtari i Historisë" nga partneri zyrtar i FIFA-s në Kupën e Botës, Budweiser. Duke qenë se ai ndodhej në gjendje të rëndë, Neymar mori çmimin për të dhe e nderoi publikisht.

Pele luajti në katër Kupa Botërore midis viteve 1958 dhe 1970, duke shënuar 12 gola në 14 ndeshje. Ai ka fituar tre herë Botërorin.