Në kohën kur Edi Rama Lulzim Basha shkëmbenin akuza në parlament për trafikun e drogës dhe Himarën, Monika Kryemadhi ishte në një takim me minatorët në Bulqizë. Kryetarja e LSI-së tha se është gati të bashkojë votat me Partinë Socialiste nëse në parlament vjen drafti për Statusin e Minatorit.
“Ne këtu nga Bulqiza duam t’i themi qeverisë shqiptare që të vijë të ulet këtu dhe të bisedojë me ju. Po u themi që ne nuk jemi në opozitë me qeverinë shqiptare për Statusin e Minatorit. Në momentin që qeveria do ta sjellë këtë status në Kuvend votat e Lëvizjes Socialiste për Integrim janë të gjitha, 19 vota, pro Statusit të Minatorit” tha Kryemadhi.
Takimi me minatorët nuk ishte përzgjedhur rastësisht të bëhej ditën e enjte.
“Jo pa qëllim ne zgjodhëm këtë ditë të enjte për ta bërë takimin me ju për të dhënë edhe një mesazh që duam të bëjmë politikë ndryshe. Duhet të harrojmë politikën e sharjeve dhe të fyerjeve dhe t’i kthehemi politikës së zgjidhjes së halleve dhe të diskutimit” tha kryetarja e LSI-së.
