Në fjalimin që mbajti para Ministrit të Brendshëm italian, Marko Miniti dhe gjeneralëve që e shoqëronin atë, Fatmir Xhafaj ia tregoi partnerëve se kush e bëri trafikun e drogës. Sipas tij ishin disa fermerë të pafajshëm dhe disa policë të paaftë, të cilët kultivuan kanabisin që sot ka pushtuar Italinë.
“Një vit më parë në 2016, jo shumë larg u konstatua një rritje e ndjeshme e kultivimit të kanabisit, nga euforia, paaftësia e strukturave tona apo aftësia e sofistikimit të krimit, kjo mbetet për t’u analizuar. Dëmi ishte i madh dhe shumëplanësh, u përfshinë shumë fermerë të pafajshëm, u përfshinë në një mënyrë ose tjetër, disa oficerë policie, të cilët më së paku ishin të paaftë, shumë të tjerë heshtën” u shpreh Ministri ynë i Brendshëm.
Në fjalim munguan bandat e trafikantëve, si ajo e Habilajve që janë arrestuar në Itali. Nuk u përmend as paraardhësi i Xhafajt në ministri, Saimir Tahiri, i akuzuar nga prokuroria për trafik ndërkombëtar narkotikësh.
Për qeverinë Xhafaj foli fjalët më të mira dhe i la meritën që reagoi shpejt: “Në më pak se një vit se sot qeveria e njohu realitetin, reaguam fort dhe pa ekuivoke dhe rezultati është ky që u bë sot në këtë sallë”
Po të ishte për qeverinë shqiptare, gomonet e mbushura me drogë do të vazhdonin të pashqetësuara udhëtimet drejt Italisë. U deshën 4 vjet përgjime të Habilajve, kushërinjve të Saimir Tahirit, që qeveria të merrte masa për trafikun e kanabisit. Ndoshta Fatmir Xhafaj foli ndryshe në takimin me dyer të mbyllura me Marko Minitin. Nëse është bërë qesharak edhe aty, me siguri do të kemi lajme të tjera përtej detit.
