Policia e Shtetit ka reaguar përmes një deklarate për mediat, ku shprehet se janë kryer të gjitha procedurat ligjore për ndalimin e shtetasit Orest Sota, i cili u kap me 800 mijë euro dhe patentat në emër të Saimir Tahirit.
Deklarata e Policisë së Shtetit është edhe kundër opozitës, për të cilën thotë se po spekullon në lidhje me këtë rast.
Më poshtë pjesë nga deklarata.
Policia e Shtetit rishpreh keqardhjen për akuzat politike dhe pa asnjë bazë ligjore apo faktike, mbi ndalimin e shtetasit Orest Sota.
Policia e Shtetit rithekson se ka kryer detyrën dhe respektuar procedurën ligjore pikë për pikë.
Pretendimet e opozitës janë spekullime politike dhe s’kanë asnjë lidhje me të vërtetën e punës së bërë nga Policia e Shtetit.
Policia e Shtetit ka ndaluar në flagrancë autorin, ka mbajtur të plotë procesverbalin në vendngjarje dhe i ka përcjellë menjëherë Prokurorisë dosjen e plotë të rastit për arrestin në flagrancë.
Policia e Shtetit i siguron të gjithë qytetarët se ajo ka bërë detyrën, po bën detyrën dhe do të bëjë detyrën e saj, pa asnjë ndikim politik në luftën me krimin e organizuar, krimin ekonomik e çdo lloj tjetër kriminaliteti.
