Në 23 tetor të këtij viti Edi Rama mbajti përpara deputetëve dhe ministrave të tij fjalimin e famshëm të përjashtimit të Saimir Tahirit nga forumet e Partisë Socialiste. Kjo lëvizje vinte në kulmin e skandalit “Tahiri-Habilaj” dhe kur Prokuroria e Krimeve të Rënda kishte bërë kërkesë në parlament për arrestimin e ish-ministrit të Brendshëm.
Këshilli i Imunitetit, Rregullores dhe Mandateve e kishte refuzuar këtë kërkesë të konsideruar si më të rëndësishmen nga organi i akuzës. Përpara votimit në parlament, Rama u rrek në një fjalim të gjatë të bindte shqiptarët se i kishin dhënë mjaft prokurorëve duke pranuar kërkesat e tjera që nisnin me autorizimin e prokurorisë për të mos lejuar daljen e ish-ministrit jashtë shtetit.
Në videon që sjell më poshtë lapsi.al Rama thotë se “u ka dhënë prokurorëve të gjitha mundësitë e nevojshme për kryerjen e një hetimi serioz, të thelle dhe shterues duke pranuar kërkesën për: dhënien e autorizimit për ndalimin e daljes jashtë shtetit; detyrimin për t’u paraqitur në Policinë Gjyqësore; ndalimin dhe detyrimin për qëndrimin në një vend të caktuar; garancinë pasurore dhe kontrollin personal dhe të banesës së deputetit të Kuvendit të Shqipërisë, Saimir Tahiri”.
Një muaj më parë Rama dukej i bindur se organi i akuzës nuk do ta lejonte Tahirin të linte vendin. Këtë të premte ish-ministri fluturoi drejt Gjermanisë, për arsyet e tij duke konfirmuar se nuk ka asnjë pengesë për tu larguar jashtë vendit. Mosarrestimi i tij sipas prokurorëve do të ndikonte në prishjen e provave dhe mesa duket rrëzimi i asaj kërkesë ka bërë të pavlefshme “ofertën” me 5 pika që Rama u bëri prokurorëve. ©LAPSI.al
