Gazetari Dashamir Biçaku zbuloi datat e daljes nga Shqipëria të tre ish-drejtuesve të policisë, Jaeld Çelaj, Sokol Bode dhe Gjergj Kohila, të cilët janë shpallur në kërkim si të dyshuar të implikuar në trafik droge me bandën e Habilajve.
Në emisionin “Opinion”, Biçaku tha se njëri prej tyre është larguar nga Shqipëria nga aeroporti i Rinasit më datë 9 Nëntor drejt Milanos.
Ish-zyrtari i dytë është larguar drejt Malit të Zi më 29 Gusht nga dogana e Muriqanit me një makinë me targa AA 808 OB, dhe ish-zyrtari i tretë u largua përmes Kakavijes më 18 Nëntor me makinë me targa AA 911 JE, shkruan tvklan.
Jaeld Çela drejtonte Policinë e Vlorës, Gjergj Kohila ishte shef i krimit të organizuar në Vlorë, ndërsa Sokol Bode ishte shef i kufirit në Dhërmi. Urdhrat e ndalimit për ta dolën që mbrëmë nga Prokuroria e Krimeve të Rënda. SHÇBA u vu në lëvizje dhe ende nuk është arrestuar asnjëri prej tyre pasi nuk po gjenden. Për këtë ka nisur një hetim për dekonspirim të aksionit. LAPSI.AL
