Kryetari i Partisë Demokratike, Lulzim Basha i është përgjigjur komentit të kryeministrit Edi Rama lidhur me situatën e krijuar nga përmbytjet në disa fshatra të Fierit. Mëngjesin e sotëm kryeministri Rama postoi në faqen e tij të ‘Facebook’, ku përshëndeste me ‘pamje spektakolare nga lumi Seman’ ku ky i fundit ishte tërhequr nga shtrati.
Në një postim në faqen e tij të ‘Facebook’-ut Basha theksoi se nuk ka asgjë spektakolare në Darëzezë, Ferras Dërmenasi, apo dhe Novosela, fshatra të cilat u goditën nga përmbytjet. Kryedemokrati tha se në këto zona balta ka mbuluar dhjetra shtëpi, ndërsa nuk kurseu ironitë. Mes të tjerash Basha pohoi se kryeministri Edi Rama duhet ta lërë propagandën e t’u zgjidhë hallet mijëra familjeve, që janë prej tre ditësh pa ujë, pa ushqime e drita.
“Nuk ka asgjë spektakolare në Darzezë, në Ferras e në shumë fshatra të tjera të Fierit ku balta ka mbuluar dhjetëra shtëpi e ka shkaktuar dëme të rënda materiale. Dhe në Dërmenas po ashtu.
Asgjë spektakolare nuk ka në Novoselë e në zona të tjera të Vlorës ku, si pasojë e përmbytjeve, ka mungesa bazike, nga ushqimet tek dritat dhe uji.
Asgjë spektakolare nuk ka në Fushë-Krujë, në Bilaj, në fshatin Hasan dhe lagje të tjera, ku uji dhe balta kanë përmbytur e marrë me vete shumë pasuri dhe kursime të qytetarëve.
Po, ka dy gjëra spektakolare! Spektakolare është përpjekja për ta nxjerrë këtë fatkeqësi në media e në ekrane si sukses qeveritar! Spektakolare është braktisja e qytetarëve nga qeveria dhe lënia nën mëshirë të fatit pas asnjë ndihmë! Edi Rama duhet ta lërë propagandën e t’u zgjidhë hallet mijëra familjeve, që janë prej tre ditësh pa ujë, pa ushqime e drita!
Edi Rama duhet t’i dëmshpërblejë për humbjet e pallogaritshme që kanë pësuar, pasi dimri është i gjatë dhe i papërballueshëm në këto kushte.” – shkruan Basha.
