Tre kushërinjtë Lika, nga Kurbini pranuan në polici se qëlluan me armë në ajër natën e ndërrimit të viteve. Tre të rinjtë dyshohen se goditën me plumbat e armës së tyre16-vjeçarin Klejdi Gjeta në lagjen Sanxhak.
Gjeta doli në tarracën e shtëpisë së tij mesnatën e ndërrimit të viteve për të parë fishekzjarret, por nuk u kthye më. Familjarët e gjetën të shtrirë në tarracë me një plagë në kokë.
Ekspertiza e policisë doli në përfundimin se Klejdi Gjeta është qëlluar me një plumb në kokë. Dyshohet se plumbi u qëllua nga Alban Lika, 25 vjeç, Ernis Lika, 20 vjeç dhe Arber Lika,18 vjeç. Të tre udhëtuan me makinën e tyre dhe për të festuar kanë qëlluar me armë në ajër.
Por tre kushërinjtë nuk tregojnë se ku e fshehën armën me të cilën qëlluan në breshëri natën e 31 dhjetorit.
