Në njoftimin zyrtar të Prokurorisë së Përgjithshme thuhet se në bisedën mes Arta Markut dhe ambasadorit italian u fol për “koordinimin për hetime të përbashkëta dhe goditjen e grupeve kriminale që operojnë ndërmjet dy shteteve”.
Në listën e hetimeve të tilla, dosja Tahiri-Habilaj mban vendin e parë. Por ndërkohë që italianët kanë ecur para me hetimet duke arrestuar grupin e trafikantëve të drogës, në Shqipëri dosja po shkon drejt shpërbërjes.
Saimir Tahiri nuk u arrestua për shkak të mburojës që garantoi PS në parlament, tre ish shefat e policisë janë në arrati, ndërsa Orest Sota doli nga burgu megjithëse u kap me 863 mijë euro dhe dy patentat e Saimir Tahirit.
Por një temë tjetër që shqetëson ambasadën italianë është edhe një dosje e vjetër, hetimet e së cilës kanë mbetur në vendnumëro. Bëhet fjalë për pajisjen e përgjimit IMSI Catcher, e cila u përdor për përgjime në territorin shqiptar dhe që ende nuk është verifikuar nga prokuroria. IMSI Catcher i kushtoi detyrën për disa javë drejtorit të Përgjithshëm të Policisë së Shtetit, Haki Çakos, që u procedua penalisht.
Haki Çako u akuzua se lejoi futjen e pajisjes së përgjimit dhe përdorimin e saj për llogari të Saimir Tahirit. Deri me sot pajisja ka qëndruar brenda ambasadës dhe nuk është vënë në dispozicion të prokurorisë.
Hetuesit shqiptarë kërkuan ekspertimin dhe dërguan një letër-porosi për të cilën prokuroria italiane ka kthyer përgjgje pozitive. Por, në mënyrë të çuditshme, ambasada nuk e vë në dispozicion pajisjen. Me ardhjen e Prokurores së re të Përgjithshme, situata mund të ndryshojë. Haki Çako vazhdon ende të mbajë detyrën, ndërsa pajisje e përgjimit vazhdon të mbahet në ambasadë dhe hetuesit ende nuk kanë mundur të bëjnë ekspertimin e saj.©Lapsi.al
