Nga Lëvizja Vetëvendosje vazhdojnë të largohen njerëz. Së fundi ka dhënë dorëheqjen zëdhënësi i kësaj partie, Shkodran Hoti. Përmes një deklarate të postuar në faqen e tij në Facebook, ai thotë se nuk mund të vazhdojë të qëndrojë në një vend me dogmatikët, naivët dhe me servilët, pa përmendur emra se cilët janë këta.
"Ka kohë që e kam bindur veten se nuk kam vend aty ku zënë vend e ulen këmbëkryq servilët, naivët dhe dogmatikët. Ndaj, me këtë letër japë dorëheqjen time nga Zyra për Media dhe Komunikim në Lëvizjen VETËVENDOSJE!, e po ashtu këtu i japë fund edhe angazhimit tim në këtë organizatë politike", ka shkruar ai.
Ditë më parë nga funksionet në Vetëvendosje janë larguar kryetari Visar Ymeri dhe deputetët Dardan Sejdiu, Shqipe Patina e Dukagjin Gorani, përfshi edhe Dardan Molliqajn. Deri më tani s’ka asnjë qëndrim publik të kryetarit të Prishtinës, Shpend Ahmeti se me cilin grupim do të pozicionohet.
Ka zëra që thonë se grupi i shkëputur nga Vetëvendosja do të formojë një parti tjetër. Ndërkohë që Vetëvendosje po shkon drejt zgjedhjeve për kryetarin e ri. Kandidati i vetëm në garë është lideri historik, Albin Kurti.
©LAPSI.al
