10-vjetori i Pavarësisë së Kosovës ka shpërndarë lajme këto ditë në të gjitha mediat e portalet. Ardhja e Rita Orës, Dua Lipës, koncerti i madh në qendër të Prishtinës, të ftuar specialë që do të përshëndetin eventin dhe përvjetorin e 10-të, organizime e shfaqje artistike – të gjitha bashkë do të plotësojnë dekorin e festës së madhe të kësaj të shtune.
Por krahas shumë programeve të përgatitura në prag të këtij eventi, dy ditët e fundit është ndarë në rrjet edhe një logo me tri vajzat e njohura të Kosovës, Rita Ora, Dua Lipa dhe sportistja Majlinda Kelmendi.
Slogani që ka bërë xhiron e rrjeteve sociale dhe që u dedikohej vajzave nga Kosova, të suksesshme përtej kufijve të vendit të tyre, në fak nuk ka përfshirë emra të suksesshëm në Kosovë. “Bac, çikat na e zbardhën ftyrën!”- shkruhet në sloganin e ri me portretet e vazjave të njohura.
Por përjashtimi i artistes Era Istrefi nga logoja duket se nuk është pritur mirë nga familjarët e këngëtares, e veçanërisht nëna e saj, Suzana. Në një prononcim për Express, nëna e Erës është shprehur se e bija është vlerësuar në të gjithë botën, suksesi i saj është i pakrahasueshëm me të të Ritës dhe Duas.
“Njerëz shumë më të mençur se ata që e kanë dizajnu/ shkru edhe se unë, e kanë shti Erën në listën e personave më të suksesshëm shqiptar, e ata që nuk e kanë shti hiç nuk është problem. Jeta është e gjatë. Suksesi i Erës është i pakrahasueshëm edhe me të Ritës edhe me të Duas. Pse është i pakrahasueshëm, sepse e dimë të gjithë. Prej një vendi të vogël një sukses që e ka arrit Era, deri sot nuk e ka arrit asnjë artist, asnjë artist i filmit, as muzikës popullore, as pop, ama bash kërkush. Dua dhe Rita kanë arritur shumë, po prej një vendi që është njëri prej vendeve ma me perspektivë dhe ma të zhvillum në botë. Unë jam ajo nana më krenare në botë, që asnjë nanë nuk e ka përjetu suksesin e fëmiut të vetë si unë”,- ka thënë nëna e Erës.
Nga ana tjetër, autorët e logos që ka marrë vëmendjen e të gjithëve janë shprehur se Era nuk është pjesë e saj, sepse ata kanë gjykuar që përsa i përket muzikës, Era nuk është e të njëjtit kalibër si Dua dhe Rita.
