Një raport konfidencial, i hartuar si pasojë e analizës së humbjes katastrofale që opozita pësoi në zgjedhjet e verës së shkuar i ka gjetur fajtorët mes armiqve të brendshëm dhe të jashtëm të PD-së. Së pari, shumica e degëve të PD-së mendojnë se në zonat rurale vota është blerë ose marrë me shantazh. Ndërsa në zonat e qyteteve, rezultati i dobët ka qenë si pasojë e punës nën rrogoz që kanë zhvilluar kundërshtarët e Bashës brenda partisë. Vetëm pasi i jep pjesën e luanit këtyre alibive për humbjen e thellë, dokumenti konfidencial i demokratëve, i zbuluar nga "Gazeta Shqiptare", pranon të shohë si defekte të brendshme rolin e marrëveshjes së 18 majit dhe mos përgatitjen për të hyrë në zgjedhje, si pasojë e efektit të çadrës.
Raporti konfidencial duket se ka përqafuar më shumë një justifikim sesa një vështrim vetëkritik duke i dhënë të drejtë tezës së Lulzim Bashës se oponentët e tij kanë sabotuar indirekt fushatën elektorale të 25 qershorit të vitit të kaluar.
Mësohet se aktivistët e PD-së kanë përmendur emra konkretë përmes raporteve konfidenciale të hartuara pas mbylljes së procesit të analizës në mbarë vendin. Në Partinë Demokratike qëndrojnë të depozituara raportet e 53 degëve, që përmbledhin një analizë të hollësishme të shkaqeve që çuan në humbjen e thellë të zgjedhje të 25 qershorit. Krahas raportit të analizës, ka edhe një raport konfidencial për çdo degë të hartuar nga të deleguarit e kryetarit Lulzim Basha në çdo qark.
Analiza konstaton se pothuajse në 90 për qind të degëve në zonat rurale, rezultati i dobët është ndikuar nga blerja e votës me para të pista, nga përdorimi i administratës, apo për shembull nga presioni për ndërprerjen e ndihmës ekonomike dhe mënyra të tjera. Por, më afër zonave urbane rezultati i dobët i Partisë Demokratike është ndikuar nga faktorë të tjerë, përfshirë ato të brendshmit. Pikërisht në këtë pikë janë përmendur emra konkretë të njerëzve që punuan kundër fitores së PD-së në zgjedhje, duke cituar konkretisht emrat e kundërshtarëve të Bashës në parti.
Burime për “Gazeta Shqiptare” konfirmojnë se bëhet fjalë kryesisht për zonat e qarkut të Shkodrës, të Vlorës, të Korçës, Durrësit, Elbasanit, Gjirokastrës, Dibrës etj.
