Shtetet e Bashkuara të Amerikës dhe aleatët e saj europianë po dëbojnë dhjetra diplomat rusë në një përgjigje të koordinuar ndaj helmimit të një ish-spiuni rus në Britaninë e Madhe.
Donald Trump urdhëroi dëbimin e 60 diplomatëve rusë nga SHBA.
Gjermania, Franca, Ukraina dhe disa vende të tjera të BE-së kanë bërë të njëjtën lëvizje.
Rusia reagoi duke theksuar se do të përgjigjet “proporcionalisht”.
Rusia mohon çdo rol në sulmin ndaj Sergei Skripal dhe vajzës së tij në Salisbury, në Anglinë jugore. Të dy janë të shtruar në spital, në gjendje kritike, por të qëndrueshme.
Zëdhënësja e Ministrisë së Jashtme ruse, Maria Zakharova, e dënoi BE-në për një ‘intepretim të shfrenuar të solidaritetit’ me Britaninë e Madhe.
Udhëheqësit e Bashkimit Europian ranë dakord javën e kaluar se ishte shumë e mundur që Rusia të qëndronte pas helmimit të ish-spiunit rus me agjent nervor.
Në SHBA, 48 nga diplomatët që do të dëbohet thuhet se janë të vendosur në Ambasadën Ruse në Uashington dhe pjesa tjetër janë në selinë e OKB-së në Nju Jork.
Është urdhëruar edhe mbyllja e Konsullatës ruse në Siatëll.
Departamenti Amerikan i Shtetit tha në një deklaratë:
“Më 4 mars, Rusia përdori një agjent nervor ushtarak për të vrarë një qytetar britanik dhe vajzën e tij në Salisbury.
Ky sulm ndaj aleatit tonë, Mbretërisë së Bashkuar, vuri në rrezik jetën e shumë të pafajshmëve, duke lënë tre persona me dëmtime serioze, mes tyre edhe një officer policie.”
Departamenti e quajti sulmin një shkelje të egër të Konventës së Armëve Kimike dhe shkelje të së drejtës ndërkombëtare, shkruan BBC.
Presidenti ukrainas, Petro Poroshenko, tha se vendimi i tij për të dëbuar 13 diplomatë rusë është marrë ‘në frymën e solidaritetit me partnerët tanë britanikë dhe aleatët transaltantike, si dhe në bashkërendim me vendet e BE-së.”
Ditën e sotme, vende të ndryshme europiane, përfshi Letoninë, Lituaninë, Estoninë dhe Poloninë, thirrën ambasadorët rusë në Ministritë e tyre të Jashtme.
Edhe Shqipëria largoi dy diplomatë rusë. Ambasadori Karpushin është thirrur në Ministrinë për Evropën dhe Punët e Jashtme, ku iu komunikua vendimi për largimin e këtyre dy personave. Në njoftimin e ministrisë thuhet se “veprimtaria e të cilëve nuk përputhet me statusin e tyre diplomatik”.
NJOFTIMI ZYRTAR I MINISTRISË SË JASHTME
Sot, në datë 26 mars 2018, në Ministrinë për Evropën dhe Punët e Jashtme u thirr Ambasadori i Jashtëzakonshëm dhe Fuqiplotë i Federatës Ruse në Republikën e Shqiperisë, SHTZ Aleksandër Karpushin, të cilit iu komunikua nota verbale për shpalljen si persona të padëshirueshëm të dy diplomatëve rusë, veprimtaria e të cilëve nuk përputhet me statusin e tyre diplomatik.
©LAPSI.AL
