Edi Rama sot ka krijuar një skenë ashtu siç do ta donte ai mbarë Shqipërinë. Teksa vendosi të bënte një piruetë të madhe, t’u kërkonte falje kuksianëve, të thoshte se për ta tarifa e rrugës së Kombit ishte e nxituar, se kjo kishte ardhur nga mungesa e eksperiencës e një praktike që zhvillohet në Shqipëri për herë të parë, ai e shndërroi të gjithën në një farsë.
Duhen vënë re dy momente.
Së pari, ai mbajti fjalën e parë në parlament në një sallë ku nuk gjendej opozita (një javë më parë kur PD dhe LSI kishin qenë aty, pati folur ndryshe).
Së dyti, sikur kjo mos t'i maftonte, ai shpiku një gjoja dialog me qytetarët e Kuksit dhe vuri aty si pupacë rrogëtarët e tij.
Lexo më tej:
Pse dhuna është e vetmja rrugë
Fiksojeni këtë burrë. Xhevdet Sopaj, loloja kuksian i Edi Ramës (Video)
Por bllofi i Edi Ramës, më shumë se sa tek këto anë të shfaqjes (që shprehin ëndrrën e tij për një skenë pa kundërshtarë dhe pa kritikë) duhet parë tek thelbi i asaj që ka bërë dhe ka thënë.
Rama e shiti taksën e njëjtë për kuksianët si për gjithë shqiptarët (5 euro për një kalim) si një aksident të paqëllimshëm, si një kurth ku ra pa dashje, si një akt normal për një qënie të gabueshme, bërë nga mungesa e eksperiencës por në asnjë mënyrë në keqbesim.
Askush nuk mund t’i thotë se ai po gënjen. Se ai as ka çarë kokën për të varfërit e Kuksit. Se edhe njëherë preokupimi i tij i vetëm ka qenë të mbrojë interesat e oligarkëve.
Por, ama e gjithë vijësjellja e tij si kryeministër na shërben si sfondi i domosdoshëm për të shpjeguar veprimin e tij të fundit. Ai gjithnjë ka marrë anën e të fortëve, të pasurve dhe jo të shtresave të margjinalizuara.
Prandaj edhe këtë radhë, ai nuk mund të vepronte ndryshe. Nëse është e vërtetë ajo që thotë, se s’ka kryeministër që do ta rëndojë me taksa popullin e vet, është po aq e vërtetë edhe tjetra, që ka kryeministra të kapur nga oligarkët që as kanë kohë dhe thjesht harrojnë të mendojnë për qytetarët. Historia e qeverisjes së tij tregon se Edi Rama po u kërkon një ndjesë të shtirë kuksianëve të rëgjuar. Se ai as nuk i ka pasur në mendje kur ka marrë vendimin për taksimin e rrugës.
Kjo është e vërteta e thjeshtë e kësaj hisorie, që me sa duket po hap një faqe të re në shoqërinë shqiptare. Deri më tani kontradikta themelore antagoniste e saj ka qenë ajo mes PD dhe PS. Me qeverisjen e Ramës po fillon një kontradiktë e re: ajo mes një grushti të pasurish dhe pjesës tjetër të të varfërve.
©Lapsi.al
