Të solidarizohesh për të dhuruar gjak, nuk tregon thjesht dëshirën për të ndihmuar ata persona që kanë nevojë për të. Do të thotë të mendosh përtej vetes , familjes dhe miqve të tu. Do të thotë të vihesh në pozicionin e një fëmije talasemik që për të jetuar, duhet të kryejë transfuzion çdo 21 ditë. Do të thotë gjithashtu të mendosh se për shkak të një aksidenti gjithkush mund të ketë emergjencë marrjen e gjakut. Do të thotë se pa të kushtuar asgjë, mund të shpëtosh jetën e dikujt dhe ky është misioni më fisnik dhe human që ka secili prej nesh.
Nga ana tjetër të dhurosh gjak, do të thotë të informohesh për një sërë benefitesh që ka ky proces për organizmin. E duke ditur të gjitha këto, të jesh ti që të sensibilizosh të tjerët.
Nën sloganin “Dhuro gjak, Dhuro jetë, mbro shëndetin tënd”, Spitali Amerikan e ka kthyer në traditë sensibilizimin për dhurimin e gjakut. Këtë vit, fokusi do të jetë tek të rinjtë e veçanërisht studentët, si potenciali më i madh në Shqipëri për dhurimin e gjakut. Gjak mund të dhurojnë të gjithë ata persona që janë të shëndetshëm nga 18 deri 60 vjeç dhe peshë minimale 50 kg. Dhurohet 450 ml ( ± 10%) dhe kjo këshillohet të bëhet 4 herë në vit për burrat dhe 2 herë në vit për gratë në moshë pjellorie.
Gjaku, përveçse një përbërës i rëndësishëm i trupit tonë, është edhe një lëndë kuruese që nuk mund të prodhohet nga industria farmaceutike, ndaj i vetmi burim i tij është dhurimi i gjakut nga njerëzit. Duhet të dini se gjaku ka një cikël riprodhimi të përhershëm prej 21 ditësh, pra është e zakonshme që ai të shkatërrohet vetë.
Para se të kryeni këtë akt soldariteti, mjekët do të sigurohen se ju gëzoni shëndet të plotë dhe ky dhurim nuk do ta dëmtojë shëndetin tuaj. Kjo realizohet nëpërmjet intervistimit dhe vizitës mjekësore. Nevojat për gjak janë shumë të mëdha pasi transfuzioni i gjakut apo përbërësve të tij, shërben shpesh për t’i shpëtuar jetën dikujt që pëson aksident (të çdo forme) apo ndërhyrje kirurgjikale të shoqëruar me hemorragji, por edhe si kurë shoqëruese në disa patologji si anemitë, talasemia, hemofilia, anemitë hemolitike, leuçemitë, të transplantuarit, etj. (artikull promocional)
