Pasditen e të martës, rreth orës 18:00 shumë shqiptarë do të lënë punët, do të lënë kafet, do braktisin çdo plan që mund të kenë, sepse në orën 18:00 shpallen fituesit e lotarisë amerikane. Mijëra vetë, kush në kompjuter, kush në celular do të kontrollojnë, nëse fati do t'i trokasë në derë për t'i dhënë mundësinë të ikin sa më larg nga Shqipëria, apo do të mbesin në këtu, gjithmonë me shpresën për ta provuar edhe një shans vitin tjetër.
Dy vite më parë, 200 mijë familje apo individë aplikuan për lotarinë amerikane, një nga shifrat më të larta të aplikimeve për numër popullsie. Njoftimin se emrat e fituesve shpallen ditën e martë e dha ambasada amerikane, bashkë me një vizatim ku duket një vajzë e gëzuar që tërheq qenin e saj. Lajm tjetër i mirë? Fituesit e lotarisë mund të marrin në Shtetet e Bashkuara edhe kafshët shtëpiake?
