Në një konferencë shtypi në Sofje gjatë samitit të liderëve të BE dhe Ballkanit perëndimor kryeministri grek Aleksis Tsipras deklaroi se negociatat me Shqipërinë po vazhdojnë dhe i karakterizoi ato tepër të vështira.
“Duhet te keni parasysh se me Shqipërinë po zgjidhim çështje nga Lufta e 2 Botërore, kemi ende ne fuqi Ligjin e Luftës, kemi temën e zonave ekonomike qe është shumë e rëndësishme dhe një sere temash te tjera, midis tyre dhe te drejtat e minoritetit grek. Jemi ne rruge te mbare. Jam (nuk do përdor fjalën -i sigurt) por shume optimist qe mund të kemi rezultat pozitiv dhe në këto negociata deri në fund të qershorit."
Tsipras sqaron gjithashtu se fillimi i negociatave mes Shqipërisë dhe BE nuk do të varen vetëm nga marrëveshja Shqipëri-Greqi dhe pohon se ndryshe nga Greqia ka disa shtete që ende nuk janë të bindur për Shqipërinë.
“Nëse Shqipëria merr dritën jeshile për çeljen e negociatave nga BE, është një procedure që nuk varet vetëm nga zgjidhja e mosmarrëveshjeve me Greqinë. Është një çështje e rajonit dhe me gjere, e cila do na mbajë dhe me shumë të angazhuar sa më shumë i afrohemi Samitit të qershorit, por ka disa shtete qe kane vlerësim ndryshe ndaj kësaj”, tha Tsipras.
