Komisioni i Medias ditën e sotme është përfshirë nga debate të shumta pas ardhjes së kryeredaktorit të gazetës së PD, i cili foli për atë që ndodhi në protestën e fundit të opozitës. Në këtë protestë Kasmi u plagos nga një oficer policie me shkop gome.
Teksa Bledi Kasmi po raportonte në komisionin e medias për ndodhitë e një jave më parë, deputetja e PS-së Adelina Rista nxori disa foto të vrasjeve të ndodhura në 21 janar të vitit 2011, ku mbetën të vdekur 4 persona. Socialistja ja drejtoi fotot gazetarit dhe deputetëve të PD duke thënë se në protestat e bëra nga opozita ka qenë e paimagjinueshme që të ndodhë ajo se çfarë ngjau në 21 janar.
Por debati dhe përplasjet kanë shkuar tjetërkund, në momentin kur deputeti i PS-së Fidel Ylli po ashtu tregoi një foto të një shkrimi të RD-së të vitit 2011, ku protesta u përgjak dhe u cilësua nga qeveria si një puç shtetëror. Në atë kohë, gazeta e drejtuar nga po Bledi Kasmi, shkruante me tituj të mëdhenj “Puçi dështoi”.
Debati në komision:
Fidel Ylli: Berisha shpalli pucistë katër gazetarë dhe i thirri në komision dhe hyri në lokal dhe i nxori me dhunë.
Albana Vokshi: Ore po turp i madh, ai është me kokën e çarë ju vazhdoni akoma fajin e ka Saliu? Ca po thua, i ra gurit me kokë?
Fidel Ylli: Kjo është dhuna që i bëni ju si opozita maxhorancës në komision, unë ju dëgjova me vëmendje, i uroj shërbim të shpejtë gazetarit, kam pasur lokal që quhej bar West që rrinin gazetarët dhe i respektoj maksimalisht ata. Nuk kujtoj Saliun e parë apo të dytë, por kur qeveria e tyre i thërriti gazetarët puçistë, gazetari në fjalë urdhëroni te RD çfarë shkruan. Ky gazetar, shikojeni, dështojnë puçistët. Nuk ma mbyllni dot gojën mua, gazetari juaj nuk është gazetar.
Luçiano Boçi: A është për ty ajo?
Ylli: Mbylle gojën e rri urtë se me mua e ke të humbur.
Ylli: Ju jeni vrasës!
Boçi: Mbaj gojën
Vokshi: Shumë mirë bëre, bravo, trego protestën e fundit dhe dhunën.
Ylli: Urdhëroni shkrimin këtu, ja ku i keni shkrimet.
Vokshi: Bini me këmbët tuaja, kush ta ka dhënë këtë është për Edi Ramën? Hiqni dorë nga plani për të shkatërruar këtë dëgjesë!
