Me Rita Orën nuk ka ndodhur as më shumë as më pak se ç'ndodh me të gjithë politikanët shqiptarë që kacavirren pas personaliteteve me famë botërore për të fituar simpatinë e publikut vendas. Zbarkimi i dytë në Tiranë i këngëtares nga Kosova nuk ka pasur asnjë ndryshim në këtë aspekt, me përjashtim të faktit se tani, gjashtë vite më vonë, vendin e Sali Berishës e kishte zënë lali Eri.
Rita erdhi për të kënduar në Tiranë me rastin e 100 vjetorit të pavarsisë në 28 nëtor 2012. Por në atë kohë ngjitja e saj në skenë në sheshin Nënë Tereza u shoqërua nga vetë kryeministri Sali Berisha. Ç’donte Berisha në atë skenë të ndërtuar për fansat 20 vjeçarë të këngëtares? Pse u filmua ngjitja e shkallëve të tij live nga TV Klan, sikur të qe ai superstari i mbrëmjes (video poshte)? Përgjigjen atëherë e dha vetë Berisha i cili e konsideroi këngëtaren shqiptare si më të madhe se Madona, diçka mes Beyonce dhe Rihanës : “Unë isha i gatshëm të vallëzoja me të rinjtë në shesh me ritmet e saj”. Në atë kohë gazetave nuk u shpëtoi ky fakt. Panorama, që qe më pranë Berishës, vuri titullin: “Rita ora live në shesh shoqërohet nga Berisha” ndërsa opozitarja Tema e konsideroi kështu: “Rita Ora ylli i mbrëmjes së djeshme? Jo, Sali Berisha”.
https://www.youtube.com/watch?v=acKfjAYgBcg
Sot, pas 6 vitesh Rita u kthye sërish në Tiranë, por këtë herë vendin e Berishës e zuri kryebashkiaku Veliaj. Natyrisht ai nuk u ngjit në skenë bashkë me këngëtaren, por e priti atë para koncertit. Ja ç’shkroi për këtë njoftimi i bashkisë: “para se të ngjitej në skenën e sheshit “Skëndërbej” këngëtarja Rita Ora, e shoqëruar nga i ati dhe e motra, u prit në një takim nga kryetari i Bashkisë së Tiranës, Erion Veliaj. Ai e falenderoi atë për imazhin që përcjell në botë si përfaqësuese e shqiptarëve dhe frymëzuese e brezit të ri dhe në shenjë mirënjohje i dhuroi asaj Çelësin e Qytetit”.
Por, pjesa më e bukur është se Veliaj nuk i rezistoi tundimit për të shfrytëzuar këtë takim për propagandë. Sipas njoftimit të dalë prej zyrës së tij, edhe këngëtarja me famë botërore (megjithëse nuk kishte më shumë se tre- katër orë që kishte zbritur në Rinas) i kishte vënë re ndryshimet e mëdha të Tiranës.
Rita Ora e vlerësoi ndryshimin që po pëson Tirana. “Mendoj se Tirana është në rrugën e saj drejt një suksesi të pabesueshëm. Me fuqinë dhe mundësitë që unë kam, do t’ia bëj të ditur këtë pjesës tjetër të botës. Mendoj se jemi në rrugën e duhur, ka energjinë më të mirë të çdo qyteti në tokë. Nga hera e fundit që isha këtu, pa dyshim që energjia ka ndryshuar, ndjehesh gjallë, miqësore, e pëlqyer dhe shumë positive” shkruajti komunikata e bashkisë.
Pra nënteksti është i qartë: në kohën e Lali Erit, Tirana është më mirë. Veliaj nuk u mjaftua me kaq. Ai jo vetëm e shfrytëzoi koncertin e Rita Orës për t’i dhënë asaj çelsin e qytetit, jo vetëm i fali çiftelinë që mbante në zyrë, por kërkoi të identifikohej me të duke e transmetuar live koncertin e saj në faqen e vet të Facebook-ut ©Lapsi.al
