Edhe këtë të enjte seanca parlamentare është zhvilluar në një atmosferë kaosi dhe rrëmuje. Pasi ka ndërprerë disa herë seancën, kryetari i Parlamentit, Gramoz Ruçi ka vendosur të kalojë në votimin e projektligjeve me vetëm një fjalë të shkurtër të Taulant Ballës.
Ndërkohë për tre seanca rresht, Lulzim Basha ka mbajtur të bllokuar foltoren e parlamentit dhe në fund i janë bashkuar të gjithë deputetët e Partisë Demokratike.
Votimin e projektligjit për "Fondin e zhvillimit për diasporën", socialistët e shoqëruan me duartrokitje, por nga ana tjetër ata të opozitës qëndronin të gjithë përreth foltores ku fliste kryetari i PD-së Lulzim Basha.
"Mbyllet votimi, tani le të vazhdojë shfaqja përmes Facebook, se kjo është zgjedhja juaj" u shpreh Gramoz Ruçi në përfundim të seancës parlamentare.
