Ish prokurori i Përgjithshëm, Adriatik Llalla nuk do t'i nënshtrohet rivlerësimit të figurës, ose siç quhet ndryshe procesit të vetingut. Kolegji i Posaçëm i Apelimit vendosi përfundimisht që dorëheqja e Llallës si magjistrat, e përjashton atë automatikisht nga vetingu. Me këtë vendim, duket se merr fund përpjekja për ta futur Llallën në proces vetingu, një nismë e kërkuar fort nga Komisioneri Publik, Florian Ballhysa.
Pika ku u mbështet kërkesa që Llalla t'i nënshtrohej vetingut ishte pavlefshmëria e dorëheqjes së tij, me anë të një letre dërguar presidentit. Dorëheqja si prokuror i thjeshtë, post i cili iu ofrua pas largimit nga detyra e Prokurorit të Përgjithshëm, e nxorri Llallën jashtë sistemit të drejtësisë.
Shmangia e vetingut duket se ka qenë qëllimi i një letre që Adriatik Llalla i dërgoi presidentit, ku deklaroi dorëheqjen si prokuror, duke siguruar më pas edhe një urdhër të Arta Markut që jepte pëlqimin për këtë tërheqje të tij.
Argumentat pro dhe kundër, a duhet t'i nënshtrohet Llalla vetingut?
Por Komisioneri Publik, Florian Ballhysa (një strukturë tjetër e organeve të Vetingut) nuk qe dakort dhe kërkoi përfshirjen e Llallës në proces.
“Llalla është magjistrat sepse është emëruar prokuror me një dekret të Presidentit, por nuk ka dekret që ta lirojë nga detyra” u shpreh Ballhysa, në një nga seancat, ku e quante të pavlerë dorëheqjen e Llallës. Argumentet kundër ish kryeprokurorit ishin se nuk ishte ndjekur procedura që thuhet në ligj, por thjesht është dërguar një letër me postë.
Në dy vendime, në fillim nga Komisioni i Pavarur i Kualifikimit, pastaj nga Kolegji i Posaçëm i Apelimit, u vendos që Llalla ishte tashmë jashtë sistemit të drejtësisë dhe si i tillë, ai nuk i nënshtrohej vetingut.
Avokati Sokol Hazizaj, mes të tjerash, citoi vendimin e 78 të Gjykatës Kushtetuese, ku thuhet se “kur subjekti i rivlerësimit është në detyrë dhe procesi i rivlerësimit nuk ka përfunduar ai ka të drejtë të japë dorëheqjen dhe procesi i rivlerësimit ndërpritet”.
“Gjërat po t’i shikosh kaq qetë dhe saktë nuk e bëjnë të vështirë një vendimmarrje të Komisionit të Pavarur të Kualifikimit, ndaj nuk e bënë dhe unë për këtë arsye kam ardhur, për të mos e bërë të vështirë procesin. Për të mos e prishur standartin për të cilin ka nisur dhe po finalizohet reforma në drejtësi. Në rast të kundërt sikur prishja e standartit, desikuilibrimi i standartit të krijuar, do ta çojë këtë proces… Dhe unë për këtë kam frikë. Kam frikë jo vetëm të karakterit moral, por edhe ligjor” u shpreh avokati i Llallës, gjatë mbrojtjes së tij.
FOTO EKSKLUZIVE/ Zbulohet vendndodhja e Adriatik Llallës
Gjatë javëve të fundit, Adriatik Llalla raportohet të ketë qëndruar jashtë Shqipërisë. Fillimisht ai i iu drejtua me një prokurë të shkruar turqisht, organeve të vetingut, ndërsa pak ditë më pas, u shfaq në Bremen të Gjermanisë bashkë me familjen e tij, sipas një foto të siguruar nga Lapsi.al
Si nisi konflikti i Llallës me ambasadorin amerikan
Në përfundim të mandatit të tij si Prokuror i Përgjithshëm dhe pas largimit nga ky post, Adriatik Llalla u sulmua ashpër nga ambasadori amerikan Donald Lu që e quajti një prokuror të korruptuar dhe e kërcënoi me burg.©Lapsi.al
