Shemsi Prenci thotë se shkarkimi i tij nga Emergjencat Civile ka ndodhur pasi nuk kishte gjetur të njëjtën gjuhë me ministren e Mbrojtjes, Olta Xhacka. Ai thotë gjithashtu se sistemi i Emergjencave Civile ka rënë përtokë që në momentin kur ato kaluan në varësi të Ministrisë së Mbrojtjes, pasi nuk i ka dhënë vëmendjen e duhur.
"Unë ministres ia kam bërë të ditur me memo e raporte të përditshme. E kam informuar gjithmonë. Uroj që memot që kam dërguar të mos ketë patur kohë t’i ketë lexuar, se nëse ka patur kohë e nuk i ka lexuar atëherë është gjëja më e keqe. Sistemi i emergjencave është në Tokë. E kam pritur lirimin nga detyra, që në janar, madje dhe vetë nuk ndihesha mirë. Tani ndihem mirë, nuk kuptoheshim mirë me Ministren. Ndoshta ngaqë vetëm unë drejtor nga Veriu, e ndoshta s’më kuptonte gjuhën. Uroj që z. Haki Çako t’i japin më shumë mbështetje se mua,” tha Prençi gja një interviste për News 24.
