Ambasada e Kosovës në Suedi është sulmuar me gurë mëngjesin e sotëm. Incidenti është konfirmuar edhe nga Ministria e Punëve të Jashtme e Republikës së Kosovës e cila përmes një njoftimi e ka dënuar sulmin që ka ndodhur sot në orët e pasdites.
Ministria e Punëve të Jashtme “vlerëson se sulme të tilla me mjete të forta, që kanë mundur të shkaktojë lëndime të rënda ndaj personelit diplomatik, teksa ata kanë qenë në kryerje të detyrës zyrtare, janë të papranueshme, dhe kërkojnë nga autoritetet e shtetit pritës, që të zbardhen sa më shpejt autorët e kësaj vepre në mënyrë që ata të sillen para drejtësisë”.
“Ministria e Punëve të Jashtme falënderon autoritetet suedeze për reagimin e shpejtë dhe bashkëpunimin e ngushtë në lidhje me këtë rast. Ky është sulmi i dytë ndaj Ambasadës së Republikës së Kosovës në Stokholm që nga hapja e saj në vitin 2009”, përfundon komunikata.
Për momentin nuk dihet ende se kush janë autorët e agresionit. Por, kjo ngjarje vjen në një kohë kur janë “nxehur” debatet lidhur me tezën e “korrigjimit të kufijve”, hedhur së fundi nga presidenti i Kosovës Hashim Thaçi.
