Lideri i Vetëvendosjes Albin Kurti ka goditur fort presidenti e vendit të tij lidhur me idenë për rishikimin e kufijve me Serbinë. Në një intervistë për Zërin e Amerikës, Kurti mbrojti tezën se Thaçi e bën këtë për t'i shpëtuar gjykatës speciale që e ka miratuar vetë, se ai po anashkalon Kuvendin e një republike parlamentare si Kosova dhe se ai po ndihmon integrimin europian të serbëve duke lënë përshtypjen se dialogu mes dy vendeve po shkon mirë.
Por, alarmi më i fortë i Kurtit ka të bëjë me kujtesën historike se shpesh idetë e ndarjes së kufijve në Ballkan kanë shkaktuar luftën: "Ne e dimë shumë mirë se si dialogu për territore është më afër luftës se sa paqes konkretisht, presidentët e Serbisë dhe Jugosllavisë në njërën anë dhe ai i Kroacisë në anën tjetër, përkatësisht (Slobodan) Millosheviç dhe (Franjo) Tuxhmani, tërë kohën kanë dialoguar për shkëmbime territoriale e për ndryshime të kufijve dhe kanë dialoguar për territore në përgjithësi dhe paralelisht kanë luftuar. Kanë biseduar atëherë për Bosnjën dhe dialogu i tillë për territore nuk është në kontrast fare me luftën" i tha ai WOA.
Veton Surroi shpjegon: gjithçka duhet të dini mbi debatin e rishikimit të kufijve
Andi Bushati: Gjithçka përveç Thaçit
Baton Haxhiu: Pse Hashim Thaçi ka të drejtë
Sipas Albin Kurtit Thaçi po e bën gjithë këtë kaos për ti shpëtuar ndonjë thirrjeje të mundshme nga Gjykata Speciale: "Për bindjen time, ajo çfarë po ndodh më shumë ka të bëjë me tendencën e tij që të jetë sa më larg Gjykatës së Posaçme që e ka imponuar vetë" deklaroi ai duke e quajtur presidentin e vendit si një nga njerëzit që e ka ndihmuar më shumë Serbinë: presidenti i Kosovës është ai i cili po dëshiron të na bindë se ai dialogu gjashtë vjeçar i mëhershëm na paska qenë i suksesshëm dhe duhet të vazhdohet i njejti sepse rruga e Kosovës për në Bashkim Evropian kalon nëpër Beograd. Unë besoj që është e kundërta. Rruga e Serbisë për në Bashkim Evropian kalon nëpër Prishtinë, mirëpo në Prishtinë po e gjejnë një njeri si presidenti jonë aktual i cili i ka ndihmuar Serbisë si pak kush tjetër në Kosovën e pasluftës" ka pohuar Kurti duke qenë pak konfuz përsa i përket një kontradikte: Ai vetë është për për bashkim të Kosovës me Shqipërinë, pra për ndryshimin e kufijve aktualë, por e rrefuzon këtë koncept kur bëhet fjalë për kufijtë e Serbisë me Kosovën.
©Lapsi.al
