Ambasada Amerikane në Tiranë ka bërë një postim të rrallë në faqen e saj në Facebook. Si rrallë herë më parë selia diplomatike fton të gjithë gjykatësit e ndershëm që të aplikojnë për Këshillin e Lartë Gjyqësor, një institucion i ri i reformës në drejtësi.
“Shqipëria është në prag të krijimit të një sistemi drejtësie që vërtet i shërben interesave të qytetarëve të saj. Iu bëjmë thirrje gjykatësve të ndershëm, patriotë dhe me integritet nga gjykatat e apelit që të bëjnë përpara dhe t’i shërbejnë vendit të tyre në Këshillin e Lartë Gjyqësor. Bëhuni pjesë e të ardhmes së Shqipërisë!” – shkruan Ambasada Amerikane.
Po pse ky shqetësim i amerikanëve për këtë çështje? Fakt është që pas fazës së parë të vetingut ku u kaluan në sitë ata që kishin aplikuar për Këshillin e Lartë të Drejtësisë dhe Këshillin e Lartë Gjyqësor një numër i konsiderueshëm nuk e justifikuan dot pasurinë apo kishin probleme me detyrën.
Me hapjen e aplikimeve për të zëvendësuar emrat e larguar, askush nga gjyqësori nuk aplikoi më. Duke parë se si u rrëzuan njëri pas tjetrit emra të njohur të sistemit të drejtësisë, të tjerët kanë menduar që të ruajnë pozicionin që kanë deri në kalimin e filtrit të Vetingut dhe nuk kanë shprehur interes për institucionet e reja të drejtësisë. ©LAPSI.al
