Partizani nuk ka më kohë për të humbur. Skuadra në dispozicion të Skënder Gegës ka nevojë për përforcime, duke patur parasysh edhe largimet e ditëve të fundit nga kampi i kuq. Në këtë pikë, për të mos lejuar kohën të mbarojë, pa i dhënë në duar armët e duhura teknikut, drejtuesit e klubit po nxitojnë në merkato, duke nënshkruar me dy lojtarë në më pak se 24 orë.
Besnik Ferati është prezantuar mesditën e sotme në ambjentet e klubit kryeqytetas, pasi ka firmosur një kontratë katër vjeçare. Mesfushori, 18 vjeçari, është formuar në ekipin e FC Shkupi dhe konsiderohet lojtari i të ardhmes, duke qenë se deri tani Ferati ka luajtur në të gjithë përfaqësueset e moshave të Maqedonisë.
Partizani ka sistemuar edhe krahun e majtë, aty ku me largimin e Kotobellit drejt Flamurtarit, kishte mbetur vetëm Kalari. Mbrojtësi nigerian Alma Abbo Wakili është akorduar me të kuqtë, duke firmosur një kontratë 1+1 me kryeqytetasit. 21-vjeçari, i cili vjen nga Shkëndija e Tetovës, i është bashkuar sot në stërvitje të kuqve.
Megjithatë, në tre ditët e fundit Partizani nuk i ka mbyllur llogaritë me afrimet. Divorci me mirëkuptim me Çanin dhe Abdurrahimin ka bërë që reparti ofensiv i të kuqve të jetë pa shumë zgjedhje, sidomos në qendër. Kështu, stafi drejtues ka vënë në shënjstër disa alternativa për të bërë edhe një tjetër lëvizje deri në 31 gusht, kur mbyllet zyrtarisht edhe merkato.
