Partia Demokratike ka vijuar sot akuzat ndaj kryeministrit Edi Rama si ideator i shantazhit ndaj gjykatësit të Strasburgut Ledi Bianku për çështjet e pronave.
Një ditë pas daljes së audiopërgjimit mes Denar Bibës dhe gjykatësit Ledi Bianku, këshilltari ligjor në Partinë Demokratike Gazment Bardhi tha sot para mediave se gjyqtari i Strasburgut rrëzoi justifikimin e Denar Bibës dhe Edi Ramës, duke e denoncuar shantazhin tek kreu i Gjykatës.
Bardhi theksoi se heshtja e Edi Ramës, është prova se ai është ideatori i kërcënimit të gjykatësit të Strasburgut. Sipas tij, gjyqtari shqiptar në Strasburg ka konfirmuar se në përputhje me detyrimet e tij etike dhe ligjore, pas takimit me Denar Bibën, ka informuar Kryetarin e atëhershëm të Gjykatës së Strasburgut, duke e cilësuar mesazhin e të dërguarit të qeverisë si ndikim të papërshtatshëm.
