Gjatë raportimit në Komisionin e Ekonomisë, Ministri i Financave, Arben Ahmetaj deklaroi me bindje se kazinotë elektronike do të largohen nga qytetet.
"Do t'i çojmë larg, larg, larg kazinotë elektronike. Nga 1 Janari me urdhër të kryeministrit do të bëjmë pastrimin e qyteteve dhe këto kazino do të lejohen vetëm në hotele me 5 yje" u shpreh Ahmetaj në komision.
Dy vite më parë, Partia Socialiste nuk ia doli ta votojë ligjin që parashikonte largimin e kazinove larg qyteteve. Vetë kryeministri Rama tha se për herë të parë nuk ia kishte dalë t'i bindte deputetët e tij që ta votonin ligjin për kazinotë dhe me propozim të disa prej tyre hyrja në fuqi u shty për janarin e vitit 2019.
Dyshimeve të kreut të Komisionit të Ekonomisë, Erjon Braçes se kësaj radhe, ligji do të hyjë në fuqi dhe kazinotë do të largohen nga qytetet, Ministri i Financave iu përgjigj duke i përmendur vendosmërinë e Edi Ramës që kësaj radhe t'i "bindë" deputetët e tij.
Ligji parashikon që kazinotë elektronikë të jenë aktive vetëm në hotelet me 5 yje.
