“Dëshmitari X”, “Babalja” apo Albert Veliu është lënë i lirë nga gjykata në Prishtinë edhe pse u ndalua ditën e djeshme për shkak të akuzave që rëndojnë ndaj tij në Shqipëri.
Ai ka pozuar me avokatin e tij Tomë Gashi.
Sot gjykata në Prishtinë ka vendosur që ta lirojë nga masa e arrestit. Avokati i tij në Prishtinë konfirmoi lajmin.
Në një komunikim telefonik me News24, Veliu tha se ka frikë të kthehet në Shqipëri. Në seancën e sotme gjyqësore, gjykata nuk e pranoi kërkesën e autoriteteve shqiptare për mbajtjen nën arrest të Babales, pasi për shtetasin në fjalë vijojnë ende procedurat për azil, shpjegoi avokati. Nga ana tjetër, procedurat për ekstradimin e tij vijojnë ende.
Babalja u arrestua dje nga policia e Kosovës në një qendër të azil-kërkuesve në Prishtinë, vend në të cilin Albert Veliu qëndronte që prej muajit qershor. Veliu pretendon se në Shqipëri i rrezikohet jeta, pasi sipas tij ai ka denoncuar një rast të trafikut të drogës. Prokuroria shqiptare ka ngritur ndaj tij akuzën për “kallëzim të rremë” dhe “kalim të paligjshëm të kufirit”.
