Fitore më e vështirë se sa mendohej për 5 herë kampionët e Botës, në miqësoren me Arabinë Saudite. Vetëm një gol në fundin e pjesës së parë nga Gabriel Jesus i ka mjaftuar Brazilit të vazhdojë serinë e fitoreve, por kaq është pak kundër një formacioni modest si ai Saudit. Alex Sandro ka mbyllur llogaritë në kohën shtesë 0-2, kur sauditët luanin me 10 lojtarë.
Skuadra e Tites kishte shumë yje por pak shkëlqim, edhe pse gjëra të bukura në fushë Selecao dhuroi, por pa intensitetin dhe spektaklin që e karakterizon. Arabia mendoi shumë për tu mbrojtur e pak për të sulmuar, por kjo ishte dicka normale për një skuadër që luan kundër verdhejeshilëve më të titulluar në botë.
U desh një magji e Neymar, me një asist që preu gjithë mbrojtjen e Arabisë, e kombinuar me shpejtësinë e Jesus, që Brazili të merrte fitoren. Minuta debutimi edhe për Richarlison, që zëvendësoi në minutën e 72 Coutinho, ndërsa ndryshe nga Botërori në Rusi, portën e ruante Ederson dhe jo Alison.
Në minutat shtesë erdhi edhe goli i dytë shënuar nga Alex Sandro, kur Arabia kishte mbetur në inferioritet numerik, pas daljes me karton të kuq të Al Owais, në të 85.
