Gjatë premierës së filmit “Delegacioni” në kinema Millenium, fitues i “Çmimit të madh” në Festivalin Ndërkombëtar të Varshavës, prania e kryeministrit Edi Rama ka bërë qe tu ndalohet hyrja gazetarëve edhe pse të akredituar.
Por jo vetëm kaq, edhe aktorët, madje ata që interpretojnë në filmin që para pak ditësh u vlerësua me çmimin “Grand Prix” në festivalin ndërkombëtar të filmit në Varshavë, patën probleme të hynin brenda. Aktori Ndriçim Xhepa, i irrituar ngaqë hostess-i nuk e kishte lejuar pa biletë, dëgjohej jashtë teksa shprehej se nuk do të hynte më, pasi e kishte parë filmin dy herë dhe se do të pinte një kafe në oborrin e kinemasë, shkruan Si.
Pas shumë lutjesh, drejtori i Tirana International Film Festival, Agron Domi raportohet se i ka thënë aktorit “hyr, të jap biletën time”. Ndërsa nga ana tjetër, Ilir Butka, drejtor i Qendrës Kombëtare të Kinematografisë, dëgjohej të thoshte se biletën e tij, ia kishte dhënë kryeministrit, Edi Rama, që sipas drejtores së Komunikimit të TIFF, Gentiana Ramadani, kishte ardhur të ndiqte filmin si qytetar.
