Ashtu siç e kishte paralajmëruar kryeministri Edi Rama i ka dërguar sërish Presidentit të Republikës Ilir Meta propozimin për emërimin e Sandër Lleshit ministër të Brendshëm.
Ky ishte qëndrimi i shprehur dhe në mbledhjen e grupit të PS pak ditë më parë ku Rama tha se “do t’i krijonin bindjen presidentit”.
Rama paralajmëroi gjithashtu se në ditët e ardhshme qeveria do t’i drejtohet dhe Gjykatës Kushtetuese për një interpretim të kësaj çështje. Ndonëse kjo Gjykatë aktualisht është jashtë funksionit, kryeministri tha se në momentin që ajo do të plotësohet me anëtarë mund ta marrë në shqyrtim.
Mos dekretimi i Sandër Lleshit si ministër i Brendshëm solli debate të shumta në politikë por Rama urdhëroi socialistët të mos e komentonin.
Kryeministri vendosi që t’ia besojë sërish drejtimin e ministrisë zotit Lleshi, por nga pozita e zëvendësministrit.
