Policia shqiptare konfirmoi zyrtarisht se Nikolla Gruevski, ish-kryeministri i Maqedonisë i shpallur në kërkim ndërkombëtar ka kaluar përmes kufirit shqiptar të Hanit të Hotit drejt Hungarisë.
Ky fakt ka nxitur jo pak kritika sa i takon sigurisë dhe ruajtjes së integritetit territorial sepse pyetja është si ka hyrë Gruevski në vendin tonë, gjë që nuk thuhet në njoftimin e policisë.
Ish-ministri i Brendshëm teknik, Dritan Demiraj ka reaguar ashpër lidhur me këtë çështje dhe ngre shumë dyshime për mënyrën se si arriti të kalojë i pa shqetësuar në kufi dhe për njohjet e tij në Shqipëri.
“Si mund të justifikohet Policia me deklaratën e saj të papërgjegjshme dhe aspak profesionale, që shtetasi Gruevski ka dalë nga pika doganore me makinë diplomatike dhe autoritetet doganore dhe policore nuk mund ta ndalonin??
Në cilin vend të botës ndodh kjo?! Nuk mund te justifikoheni që personi ne fjale nuk ka qenë në kërkim ndërkombëtar. Si ka mundësi të kalojë kufirin një person që nuk ka pasaportë, pasi të gjitha dokumentet e identifikimit te kriminelit Gruevski i janë sekuestruar me kohe nga shteti maqedonas?
Gruevski duhej ndaluar, por siç duket ndonjë “telefonatë” mund t’ja ketë hapur rrugën, ashtu siç ka ndodhur në shumë raste që i është hapur dhe trafikanteve te drogës dhe personave në kërkim ndërkombëtar, apo mos doni të justifikoheni se nuk kemi Ministër te Brendshëm??”, - shkruan ndër të tjera Demiraj.
