"Panucci ik" ishin thirrjet e degjuara në stadiumin "Loro Boriçi", të kuptueshme pas një serie negative rezultatesh, një goleade që nuk ndodhte prej 25 vjetesh brenda mureve të shtëpisë dhe një 0-4 të turpshme në mbyllje të Liges së Kombeve përballe Skocisë. Asgjë nuk mund të legjitimojë shkërmoqjen e kuqezinjve të Christian Panucci në ndeshjen deçizive: idiotësia e Mavrajt vetëm sa i lehtësoi rrugën Skocisë në parakalimin triumfal në Shkodër, sepse ndeshja kishte marrë ndërkohë tatëpjetën. Asnjë ide, as nga garda e vjetër e as nga të rinjtë: skuadra e italianit vetëm skuadër nuk është. E paaftë të mbrojë e pazonja të shënojë: vetëm dy në 8 ndeshjet e fundit, me 16 gola të pësuar. Për Panucci ishte ndeshja vendimtare. Presidenti Duka kishte kohë që e deklaronte, edhe pse italiani e shmangte si argument. Asnjë mungesë, sado e rëndësishme, nuk justifikon statistikat e tmerrshme të teknikut: 13 ndeshje në detyrë ku italiani mori vetëm tre fitore, dy barazime dhe 8 humbje. 2018 e Panucci është errësirë e plotë ku në 8 ndeshje nga të cilat 4 miqësore, kemi marrë vetëm fitoren kundër Izraelit dhe barazimin me Jordaninë. Ky ishte fundi i parashikuar i Panuccit, një lojtar i madh dikur, por ende jo trajner...
