18-vjeçari Daniel Dobra, i arrestuar nga policia si personi i dyshuar që plagosi me kapsollë oficeren e policisë së shtetit, Ina Nuka, ka dhënë dëshminë e tij për ngjarjen para grupit hetimor. Mësohet se ai ka mohuar të jetë i përfshirë në hedhjen e kapsollës drejt oficeres së policisë, e cila humbi gishtat e njërës dorë.
“Protestova dhe unë para parlamentit por nuk kam përdorur sende të kundraligjshme. Pranoj që kisha 3 kapsolla që ndeza dhe i hodha te llamarinat te Xhamia. Disa punonjës policie donin të më ndalonin por unë nuk pranova të futesha në makinë. Ndërhynë disa persona të tjerë dhe e gjeta veten në turmë dhe më pas u largova”, mësohet të ketë thënë 18-vjeçari.
Oficerja e policisë është dërguar mbrëmë në Stamboll për mjekim më të specializuar.
