Pa ndonjë shkëlqim të vecantë, por me sigurinë e krijuar javë pas jave, Teuta thyen në Niko Dovana Luftëtarin, për ta cuar në 5 serinë e ndeshjeve pa humbje në kampionat. “Shumë të rëndësishme janë pikët. Ne luajmë një futboll të mirë, nuk bëjmë spektakël, por asnjë skuadër nuk bën spektakël”.
I mjaftoi bregdetarëve të Shkëmbit goli i shpejtë i Kallakut, për të mbajtur nën fre Luftëtarin e Mezanit, që bëri pak për të legjitimuar emrin që mban. “E vërtetë, ishim në gjumë minutat e para – tha Mezani -. Ia kërkoja çunave, sepse çështja e përqendrimit është e rëndësishme, dhe shpresoj të jetë e para dhe e fundit, që pësojmë kaq herët. Kundërshtari nga gjeti të papërgatitur”.
Kontrollin e lojës durrsakët e mbajtën, pa u tërhequr prapa, madje duke përdorur daljet e shpejta dhe tentativat nga distanca, që nuk e surprizuan asnjëherë Rucin. Me një mbrojtje solide dhe garancitë që vinin në mesin e fushës, Shkëmbi nuk rrezikoi pothuaj asgjë në pjesën e parë, duke e mbajtur kundërshtarin larg.
Në fakt nuk ishte mission i vështirë, duke qenë se për Shkurtajn u kujdesën mirë shtatlartët e qendrës, duke i lënë pak, ose edhe aspak hapësirë. E në nervozizmin për një lojë të pamundur, Lufëtari rrezikoi të kapitullonte në më shumë se një rast. Presingu lart i durrësakëve ishte celësi i suksesit të ndeshjes dhe shëkmbi pati inteligjencën të kuptonte se edhe pa sforco mund të mbante në shtëpi tre pikë të rëndësishme, që e afrojnë me objektivin.
Ishte mbrëmja jo për bluezinjtë, që mund ta zgjidhnin situatën vetëm individualisht, e tentoi Rroca, por edhe aty pa sukses, duke mos e shmangur dot humbjen e 9 në 14 javë. Nuk zbret në pozita skuadra e Mezanit me 13 pikë, por ideja për të përsëritur fitoren 3-1 të fazës së parë mbeti mirazh.
