Akademiku kosovar Rexhep Qosja është pro idesë së “korrigjimit të kufijve” me Serbinë, por thotë se kjo nuk është terminologjia e duhur. Sipas tij, “shkëmbimi i territoreve” është zgjidhja me e mirë e problemeve mes Kosovës e Serbisë. Akademiku mbështet idenë e ndryshimit të kufirit, por sqaron keqkuptimet që janë hasur në këtë proces.
“Keqkuptim të veçantë të çështjes së shkëmbimit të territoreve përfaqëson togfjalëshi “ndarje e Kosovës”. Me këtë togfjalësh në disa raste synohet zhvlerësimi i skajshëm i çështjes së shkëmbimit të territoreve, i korrigjimit të kufijve, i lëvizjes së kufijve, që në asnjë rast nuk kanë qëllimin, prandaj as kuptimin e ndarjes së Kosovës”, - ka thënë Qosja.
Qosja tregoi pse është pro këtij projekti, që sipas tij ka ardhur nga intelektualët shqiptarë, jo nga Serbia.
“Shkëmbimi i territoreve: i veriut të Mitrovicës, natyrisht pa objektet vitale për zhvillimin e Kosovës, me Luginën e Preshevës (Preshevë, Bujanoc e Medvegjë) do të ishte zgjidhja politike, shtetërore e kombëtare, domethënë do të ishte zgjidhja historike e çështjes së marrëdhënieve të Kosovës me Serbinë”, - thotë Qosja.
Deklaratat e Hashim Thaçit se bashkimi Luginës me Kosovën duke mos dhënë asgjë, e sheh si folklor politik. Qosja thotë se ata duhet ta pranojnë se çdo gjë mund të realizohet vetëm duke i dhënë Serbisë, veriun e Kosovës, i cili është i banuar me shumicë serbe.
