Basha, e ka konsideruar projekt-buxhetin e vendosur ditën e sotme si më katastrofalin në 28 vite demokraci. Ky buxhet, sipas Bashës ngarkon edhe foshnjet e sapolindura me borxhe.
"70 mijë biznese janë mbyllur gjatë kohës së drejtimit të kryeministrit Rama", shprehet Basha.
Basha nxjerr si shkak të falimentimit të tyre rritjen deri në 7-fish të taksës vendore.
Sipas kryetarit të Partisë Demokratike, projekt buxheti i miratuar ditën e sotme është jo favorizues për familjet në nevojë.
“Këto para shkojnë për fasada, luks qeveritar dhe elektoral. Paratë e shqiptarëve po bëhen rrush e kumbulla. Vetëm në projektin korruptiv të Unazës së Re do të hidhet një shumë e barabartë që shteti parashikon të harxhojë gjatë një viti për familjet në nevojë ekonomike.Kemi mbi 150 mijë familje në nevoja ekstreme që nuk sigurojnë dot bukën e gojës. Buxheti për këta njerëz është i barabartë me vjedhjen e Unazës së Re”, u shpreh ai.
Sa i takon borxhit kombëtar Basha u shpreh se shifrat janë tepër të larta.
“Sot ka një borxh të deklaruar, së bashku me llogaritjet e KLSH prej afro 74% dhe ka një borxh tjetër që e mban të fshehur, borxhi i PPP që ka shkuar mbi 2.2 miliard euro. Shqiptarëve borxhi u shkon 82-84%. Ndërkohë që janë parashikuar vetëm 40 milion euro për të pangrënët.Kemi një alternativë për të nxjerrë vendin nga kjo krizë. Alternativa është vendosja e taksës së sheshtë 9%, si domosdoshmëri për të konkurruar me rajonin. Vendosjen e një tavani ku nuk mund të ngrihen taksat e pushtetit vendor, eliminimin e menjëhershëm të taksës së qarkullimit.
Gjithashtu duhet bërë rikthimi i fashave mbrojtëse për energjinë elektrike dhe për shtresat në nevojë. Anulimi i të gjithë koncesioneve korruptive. Të harrojnë se do t’i gëzojnë paratë që kanë marrë apo ato para që parashikojnë të marrin”, u shpreh Basha.
