Pak javë pas dënimit nga Gjykata e Shkallës së Parë me 55 vjet burg në total të grupit të Emiljano Shullazit, në dyert e Prokurorisë së Tiranës është shfaqur biznesmeni Ylvi Beqja. Ai është dëshmitari i mbrojtur i drejtësisë pasi dëshmia e tij fundosi Shullazin për çështjen e ish-hotel “Vollgës”. Beqja qëndroi brenda godinës për rreth 40 minuta ku u pyet për veprën penale të pastrimit të parave.
Ai u shoqërua nga forca të operacionales me një automjet të blinduar, të garantuar nga Drejtoria e Mbrojtjes së Dëshmitarëve, të cilët mbrojnë dëshmitarin e drejtësisë. Sipas Panoramës, Beqja dhënë shpjegime përpara drejtueses së Prokurorisë së Tiranës, Elisabeta Imeraj, e cila ka pasur më parë në dorë dosjen “Shullazi” te Krimet e Rënda, përpara se të transferohej.
Sipas të njëjtave burime pyetjet kanë qenë rreth transaksioneve për ish-hotel “Vollgën”, të cilin Beqja e regjistroi me ndihmën e Shullazit në Hipotekë. Pas seancës së pyetjeve Beqja zgjodhi daljen e pasme të Prokurorisë për t’i shpëtuar vëmendjes së mediave.
