Studentët e nisur nga Korpusi, të cilëve iu bashkuan sot edhe studentët e Universitetit “Luigj Gurakuqi” të Shkodrës, janë duke marshuar mespërmes Tiranës me thirrjet:
“Bashkohuni me ne, mos rrini në kafene,” "Jashtë politika, jashtë organizatat!', "Këtu nuk ka parti, ka vetëm rini!'. Por, aty ka spikatur paralajmërimi; grevë urie të martën, nëse s'plotësohen kërkesat.
Studentët kanë mbushur rrugën e Durrësit dhe kanë bllokuar qarkullimin. Thirrjet e tyre të shoqëruara nga bilbilë e megafonë, janë të fuqishme dhe i kërkojnë ndër të tjera ministres Lindita Nikolla të dalë në bulevard dhe t’u bashkohet atyre.
Sot është dita e gjashtë e protestës.
Studentet kanë vendosur si afat të fundit ditën e martë për plotësimin e kërkesave të tyre.
“Nëse nuk plotësohen, të martën do jetë protesta më masive që keni parë”, u shpreh një prej studenteve.
