24 vjeçarja e forcave “Shqiponja”, Ina Nuka, e cila prej plasjes së një kapsolli në dorë humbi njërin nga gishtërinjtë, ndodhet në gjendje të mirë shëndetësore.
Nuka u plagos në protestën e 22 Nëntorit, prej banorëve që preken nga projekti i “Unazës së Madhe”.
Prej dy javësh, ajo po merr trajtimet e duhura në spitalin e kryeqytetit turk, Ankarasë. Dy ndërhyrjet e para kanë rezultuar me sukses, por një tjetër ndërhyerje akoma më e madhe pritet javën e ardhshme.
Një burim pranë saj u shpreh se ndërhyrja e rradhës do të bëhet për të zëvendësuar gishtin e madh të dorës së saj.
Ina Nuka u përpoq të hiqte nga qafa një kapsoll të hedhur prej banorëve të Astirit gjatë protestës së tyre para kryeministrisë. Gjatë momentit që po e largonte kapsollin me dorë, ai plasi, duke i shkaktuar asaj pasoja, siç ishte humbja e gishtit të madh të dorës.
Deri më tani, 18 vjeçari Daniel Dobraj akuzohet si autor i kësaj plagosje. Hetimet janë ende në proces.
