Me qindra qytetarë kanë dalë ditën e sotme për të protestuar në Devoll dhe Shkodër.
Në Devoll ata kanë bllokuar aksin që lidh qytetin e Korçës me Bilishtin. Qytetarë, fermerë dhe përfaqësues të bizneseve të vogla dolën në protestë për uljen e çmimit të naftës, energjisë elektrike dhe për të kërkuar ndihmë për fermerët e zonës.
Me qytetarët e Devollit janë solidarizuar dhe shoferët e makinave.
Sa i takon protestave në qytetin e Shkodrës, ato vijojnë me të njëjtin intensitet prej katër ditësh. Qytetarët shkodranë protestojnë për kushtet e vështira ekonomike, kundër rritjes së çmimit të naftës si dhe rritjes së taksave.
Protestuesit kanë bllokuar sërish hyrjen e qytetit të Shkodrës.
