Taulant Balla është shprehur se ligji i Arsimit të Lartë nuk mund të ndryshojë. Ky ligj ka shenjuar një moment historik në garantimin e autonomisë së universiteteve publike, sipas tij.
Gjithashtu Balla është shprehur, se PS nuk e sheh plotësimin e 8 pikave si një përgjigje që i duhet dhënë studentëve që të mbyllet çështja e të shkohet në shtëpi për të ngrënë gjelin e Vitit të ri.
“Qëndrimi ynë është shumë i qartë. Ne nuk duam që kjo protestë të mbyllet. Ne duam një proces dialogu mes qeverisë dhe studentëve do të shkojë përtej 8 pikave. Ne e konsiderojmë këtë si një moment shumë të rëndësishëm, të thellojmë një reformë të shumanshme të arsimit në tërësi.
Arsyeja pse ne insistojmë tek dialogu është për të përfshirë konceptin e bashkëqeverisjes, për t’u mirëkuptuar me studentët, në radhë të parë dhe me gjithë universitetin në mënyrë që të ndryshojmë një gjendje që ligji Arsimit të Lartë nuk e ka ndryshuar. 8 pikat nuk janë ndryshimi i gjithë problemeve që ka Arsimit i Lartë në Shqipëri. Nuk e shohim mbylljen e protestës dhe plotësimin e 8 pikave si zgjidhje që hajde t'i plotësojmë dhe të ikim të hamë gjelin e detit për Vitin e Ri”, u shpreh Balla.
Balla ka ironizuar dhe një pjesë të protestuesve, duke i quajtur punonjës të Bashkisë së Kamzës.
“Poshtë dritares pashë 3 punonjës të Bashkisë së Kamzës që s’kanë pasur fatin të shkojnë në universitete”, tha ai teksa shtoi se: “Dialogu mes qeverisë dhe studentëve është zgjidhja më e mirë. Studentët, nga Shkodra e deri në Elbasan të vijnë në sallën e Parlamentit. Ligji i Arsimit të Lartë është një moment historik, për t'i dhënë autonominë që kërkojnë universitetet publike në vend. Por ligji Arsimit të lartë është thelbi i një universiteti me autonomi. Nuk do të ketë asnjë taksë për fëmijët e personave më ndihmë ekonomike dhe asnjë pagesë për ata që janë me rezultate të shkëlqyera”, u shpreh ai.
