Kryeministri Edi Rama dhe ministri i Brendshëm Sandër Lleshaj, kanë zhvilluar një takim ditën e sotme me efektiven e policisë që u plagos në dorë nga një kapsoll, gjatë protestës së banorëve të "Unazës së Re".
Efektivja Ina Nuka është pyetur prej tyre në lidhje me gjëndjen e saj shëndetësore. Rama i ka premtuar asaj, solidaritet ekonomik dhe moral.
“Do bëjmë dhe një vendim për të të dhënë një mbështetje financiare dhe morale, dhe të kesh ndjesinë e plotë të solidaritetit tonë dhe të kesh mundësinë që të rehabilitimin e plotë. Do fillosh pak nga pak punën, për një detyrë të lehtë në fillim dhe më pas me detyra të tjera”, tha Rama.
Efektivja ka treguar eksperiencën e saj në spital dhe se për pak do të kishte humbur krejtësisht gishtat e njërës dorë.
“Mjekët atje kanë bërë një punë të shkëlqyer dhe më thanë se nëse do të kisha shkuar dhe dy orë me vonesë, do të kisha humbur gishtat. Por unë sa shkova më futën direkt në sallë të operimit dhe më kanë ndihmuar shumë”, u shpreh Nuka.
Rama i ka treguar efektives se vetë presidenti i turqisë, Erdogan, ka qenë ai që është kujdesur për rastin e saj.
https://www.facebook.com/edirama.al/videos/264958410843280/
