Në çdo qytet të Shqipërisë, në sheshet ku do të festohet do të vendoset një autoambulancë nga ora 19:00 deri në përfundim të festës.
Përveç 9 autoambulancave të shpërndara në Tiranë në post-stacione, sipas planit të riorganizimit të Urgjencës Mjekësore, do të ketë edhe dy autoambulanca të tjera në dizpozicion të festës të vendosura në sheshin Skënderbej.
Ministrja e Shëndetësisë dhe Mbrojtjes Sociale, Ogerta Manastirliu, gjatë takimit me ekipin e urgjencës së Spitalit Universitar të Traumës, tha se janë marrë të gjitha masat që spitalet të jenë në gatishmëri për t’iu përgjigjur të gjitha thirrjeve në rast nevoje
“Kemi marrë të gjitha masat që natën e ndërrimit të viteve urgjencat mjekësore, ambulancat, njësia e helikopterëve të jenë në gadishmëri për t’iu përgjigjur të gjitha thirrjeve në rast nevoje. Ndalimi i tregtimit të fishekzjarreve këtë vit pritet të lehtësojë edhe traumat që çdo vit shkaktohen nga fishekzjarret dhe mjetet piroteknike”, u shpreh Manastirliu.
Sipas urdhrit të ministres Manastirliu, masat e përforcuara do të zbatohen prej të gjithë ekipeve mjekësore në datat 31, 1 dhe 2 janar 2019, për t’iu përgjigjur të gjitha thirrjeve për ndihmë të qytetarëve.
