Pasi vrau bashkëshorten dhe kunatën e tij në Ballsh, mësohet se Gazmend Musta është larguar së bashku me dy fëmijët. Prej dëshmive të fqinjëve zbulohet se ndërkohë që ai largohej, fëmijët e pyesnin se çfarë i kishte bërë nënës së tyre.
“Ishin familje e rregullt, nuk kemi dëgjuar asgjë për ata, ishin shumë të rregullt, dilnin bashkë. Dje pasdite dola dhe ai kishte marrë fëmijët njërin në krah dhe tjetrin për dore. Fëmijët bërtisnin, çfarë i bërë mamit. Ne nuk i njohim nga afër, por dukeshin sikur shkonin mirë. Nuk kishim dëgjuar konflikte të mëparshme” u shpreh një fqinje.
Një tjetër fqinj deklaroi se çifti kishte jetuar në Greqi për disa vite.
“Gazmendi ishte djalë i mirë. Unë jam vetë në emigracion prej 25 vitesh dhe nuk e di si shkonin, por nuk kanë pasur konflikte. Ai ka qenë më parë në Greqi me familjen dhe më pas është kthyer. Kanë dy fëmijë” tha ai.
Gazmend Musta, 34-vjeçar, mësohet se në gjendje të dehur ka goditur me thikë bashkëshorten e tij, 31-vjeçaren Gentiana Çaushaj dhe motrën e saj, 18-vjeçaren Merisa Çaushaj. Dy viktimat e këtij sulmi kanë ndërruar jetë menjëherë.
Musta i goditi viktimat për shkak se ato kishin planifikuar të shkonin për vizitë te prindërit e tyre. Policia ka mundur të arrestojë në flagrancë autorin e këtij krimi.
